Sykkylven storband

Sykkylven storband vart stifta 20. februar 1976. Sykkylven hadde eige storband også under leiing av Carl C. Tandstad frå 1969, som ein del av Musikklaget Lurlåt. Dette vart lagt ned den dagen Sykkylven storband starta opp som eige lag.

Det nye Sykkylven storband vart eit populært storband i Møre og Romsdal. Bandet hadde mange spelejobbar og vart ei drivkraft for jazzmiljøet i Sykkylven fram mot 1990. Etter nokre år med berre sporadiske prosjekt, kom bandet i fast drift igjen i januar 2003.

Med i festivalar

Sykkylven storband har i hovudsak vore samansett av musikarar frå Sykkylven, men bandet har også hatt medlemar frå nokre nabobygder. Repertoaret har vore allsidig, frå tradisjonelle og svingande storbandlåtar, til latin, jazzrock og funk.

Etter 2003 har Sykkylven storband delteke på Storbandfestivalen i Ålesund fleire år på rad, og bandet deltok på storbandfestival i Tønsberg saman med Hilde Louise Asbjørnsen i 2009.

Storbandet held eigne konsertar og spelar i både bryllup og under konferansar. Eit av storbandets stilarrangement var lenge det årlege Romjulsballet som vart arrangert saman med Blue Horn Jazzband i Sykkylven kulturhus.

Rekruttering

Storbandet har også hatt samarbeidsprosjekt med andre band som t.d. bluesbandet Woodleg Odd`s og Blue Horn Jazzband, og med artistar som Fredrik Steen, Maria Holand Tøsse, Margrethe Velle Ødegård, Leif Atle Strand, Knut Eilefsen, Hilde Louise Asbjørnsen, Adam Douglas, Frank Bjørdal, Frode Alnes og Elisabeth Andreassen.

Sykkylven storband søkjer stadig etter nye utfordringar og spanande samarbeidspartnarar slik at bandet kan fornyast og bidra til auka interesse for storbandmusikken, dette også for å sikre framtidig rekruttering og drift av Sykkylven storband. Mange unge musikktalent har fått sine første erfaringar med jazzmusikken i Sykkylven storband og har seinare satsa på både utdanning og ein musikarkarriere innan jazzen. Her kan nemnast Kenneth Ekornes og Sturla Hauge-Nilsen. Dei første åra var det berre menn med i bandet, men kvinnene var heilt frå starten viktige støttespelarar. Gjennom ulike dugnader var dei med å skaffe pengar til instrument. Seinare har kvinnene kome med for fullt også som musikarar, og i 2019 utgjorde dei halve besetninga i Sykkylven storband.

I april 2019 vart 50 år med lokal storbandhistorie feira med verbale og musikalske tilbakeblikk under ein jubileumskonsert i Sykkylven kulturhus. Dirigent i bandet dei siste åra har vore Åge Frøystad.

Kjelde

• Åge Brigt Frøystad: Kort bandhistorie. Upublisert 2012.
• Omtale av jubileumskonsert i Sunnmørsposten 15.4.2019.