Anders Nilsson Rundesletten
Anders Nilsson Rundesletten (fødd 1. desember 1854, død ca. 1895?) var gardbrukar i Nord-Etnedalen i Valdres.
Han hadde den fyrste delen av barndommen sin på Øvre Ton (gnr. 32/5) i Nord-Etnedalen i dåverande Nord-Aurdal kommune, no i Etnedal kommune. Foreldra var gardbrukarparet Nils Nilsson (1811-82) og Ingrid Amundsdotter (Bjørnsdotter?) (1821-92). Dei kjøpte i 1865 også Sørre (Syegarden) Steinset (gnr. 31/15), og familien flytta dit. Øvre Ton hadde dei attåt til 1870.
Den 8. januar 1881 gifta Anders seg med Ragnhild Mikkelsdotter Steinset (1847-1906) frå grannegarden Syegarden (Oppigarden) Steinset (gnr. 31/9). Ho var dotter av Mikkel Nilsson Steinset (1808-81) og Astrid Larsdotter f. Ton (1823-92). Anders og Ragnhild fekk tre jenter som vaks opp: Anne (1882-1965), Inger (1884-1954) og Ingeborg (1888-1914).To gutar døydde berre nokre månader gamle.
Anders og Ragnhild Steinset kjøpte i 1883 bruket Holo (gnr. 32/12) i Nord-Etnedalen. Seks år seinare bytta dei med Henrik Mikkelson og Marit Olsdotter, som hadde Rundesletten (gnr. 31/11) i same bygdelag. Dette var eit bruk som farbroren hennar Ragnhild, Nils, hadde fått skild ut frå Steinset.
Anders døydde i 1890-åra, men Ragnhild dreiv Rundesletten vidare saman med døtrene sine. Ragnhild døydde i 1906, og seks år seinare solgte døtrene Rundesletten. Seinare eigarar har bygd opp eit heilt nytt tun og gitt bruket namnet Bjørkset.
Kjelder og litteratur
- Hvattum, Harald: Gard og bygd i Etnedal : band A - Bygdehistorie. Bustader og slekter i Nord-Etnedal, Etnedal kommune 1989. Digital versjon på Nettbiblioteket, s. 283, 288, 294, 295, 320 og 326.
- Anders i Klokkerbok for Skrautvål sokn 1834-1887 (dåpsbarn)
- Anders Nilsen i folketelling 1865 for Nord-Aurdal prestegjeld fra Digitalarkivet
- Anders Nilsen i Klokkerbok for Nord-Etnedal 1876-1895 (brudgom)
- Anders Nilsson Rundesletten i Historisk befolkningsregister.