Johanna Bugge Berge (1874–1961)
Johanna Bugge Berge, f. Bugge (fødd 1. oktober 1874 i Christiania, død 28. november 1961 i Skien) var kunstmålar. Ho var også aktiv i arbeidet mannen hennar, Rikard Berge, gjorde med innsamling av folkeminne og folkemusikk.
Slekt og familie
Ho var dotter av professor Elseus Sophus Bugge (1833–1907) og Karen Sophie Schreiner (1835–1897). Faren tilhøyrde slekta Bugge, medan mora var frå slekta Schreiner.
Ho vart i 1908 gift med konservator og folkeminnesamlar Rikard Berge.
Liv og virke
Johanna Bugge var ein del av kunstnarmiljøet rundt Oluf Wold-Torne, Wilhelm Wetlesen, Thorvald Erichsen, Lars Jorde, Halfdan Egedius og Torleiv Stadskleiv, og ho fekk opplæring av blant anna Gerhard Munthe. I 1894 var ho med på den såkalla Vågåsumaren, og ho reiste også andre sumrar i 1890-åra rundt i Telemark og Gudbrandsdalen. I 1898 debuterte ho på Haustutstillinga med eit figurbilete. Ho var òg med på verdsutstillinga i Paris i 1900 med «Gårdsinteriør», målt i 1899. Dette fekk ho ein Mention Honorable for.
Motiva var stort sett henta frå norsk natur, folkeliv og folkekunst. Ho sto òg bak ein del portrett og portrettkopiar. Det var særleg i landskapsmåleriet at ho viste sin eigenart som kunstnar, men ho slutte tidleg med dette. Etter at ho gifta seg gjekk mye av tide med til å hjelpe mannen med hans innsamlingsarbeid av kulturhistorisk materiale. Under reisene deira rundt i landet kopierte ho ofte rosemåling og anna folkekunst. I 1916 vart ho faglig hjelpar på Fylkesmuseet for Telemark og Grenland i samband med at Rikard Berge vart fylkeskonservator. Dermed vart det enda mindre tid til kunsten.
Litteratur
- Johanna Bugge Berge i Historisk befolkningsregister.
- Skedsmo, Tone: Johanna Bugge Berge i Norsk biografisk leksikon.