Kristofer Leirdal
Kristofer Leirdal (født 15. desember 1915, død 6. juli 2010 i Trondheim) var ein bilethoggar frå Aure kommune på Nordmøre. Han var son av småbrukar og snekkar Sakarias Skogan (1880–1951) og Karen Leirdal (1883–1966), og var gift med Aina Thiis (f. 1924).
Leirdal laga fleire skulpturar til Nidarosdomen i Trondheim, hovudsakleg frå 1941 til 1942 og 1946 til 1983. Han var sentral i oppbygginga av eit vitalt kunstmiljø i byen. I Steinkjer har han laga statuen «Mann og hjul» i parken ved Biltilsynets verkstedhall (1970) og relieffet «Livets gang» kring hovudinngangen ved Steinkjer krematorium (1951).
Utdanning
Leirdal si fagutdanning var: Møbellinja ved Statens Håndverks- og Kunstindustriskole i Oslo (1936-1938), bilethoggarlinja ved Statens Kunstakademi (1938-1940) og Det kongelige kunstakademi i København (1945-1946).
Arbeid
Kristofer Leirdal laga fleire hovudverk for Nidarosdomen, blant anna «Den seirende Kristus» (1956) og «St. Mikael» (1965). St. Mikael er modellert med Bob Dylans ansiktstrekk, som uttrykk for kunstnerens støtte til motstanden mot Vietnamkrigen.
Han står også bak andre verk som er utstilte offentleg: Krigsmonument ved Domkirkegården i Trondheim (1948), monument over dei omkomne etter Titran-ulykka på Frøya i 1899 (1949), «An-Magritt og Hovi-stuten» ved Ila kyrkje (1967), monument over krigsseglarane på Krigsseilerplassen i Trondheim (1982) og trerelieffet «Jola, Sola-hemmeln og Sjyn» i Aure rådhus (1985).
Anna
Leirdal var ein av stiftarane av Kunstskolen i Trondheim, og 1946-1952 var han lærar for skulpturklassen der. Han var også lærar i plastisk form ved Institutt for form og farge på arkitektavdelinga ved NTH 1952–1982. I utviklinga av Trondhjems Kunstforening spela Leirdal ei stor rolle, og han var også aktiv i utviklinga av det som i dag er Trondheim kunstmuseum.
Ridder av 1. klasse
Det Kongelige Norske Videnskabers Selskabs minnesjetong i sølv (1965), Domkirkemedaljen i gull (1986), Trondheim kommunes kulturpris (1987). Sør-Trøndelag fylkeskommunes kulturpris (1987) og ridder av 1. klasse av Den Kongelige Norske St. Olavs Orden (1997).
Kjelder
- Arne Kristian Gansmo: Stor Domen-kunstner er død
- Harald O. Kalland: Om bilethoggaren Kristofer Leirdal. I: Årbok for Aure historielag, 2009
- Svein Thorud: Kristofer Leirdal
- Personleg brev frå Kristofer Leirdal ang. "Jola, Sola-Hemmeln og Sjyn", datert 29. oktober 1999: Digital utg. på Arkivportalen
- Steinkjerleksikonet
- Kristoffer Leirdal i Historisk befolkningsregister