MB «Dreng»
MB «Dreng», M-64-VA, er ein båt som er heimehøyrande på Høydalsneset i Høydalen, Volda kommune.
Båten er bygd som klinka hekksbåt i 1928 av Hans R. Høydalsvik frå Hansgarden i Vikane, (Høydalsvikane) i Volda kommune. Dei var flinke båtbyggarar i fleire generasjonar. Kor mange færingar og jollar dei har bygt er det ikkje dokumentasjon på. Det er vel heller sjeldan ein finn slike opplysningar.
Båten var tinga av Hans S. Høydalsnes. Lengde (lengste lengde)/ breidde/ djupne målt i fot var; 21,0/ 6,5/ 3,0.
Hans S. Høydalsnes hadde vore lærar mellom anna på Yksnøya i Volda og i Vennesla ved Kristiansand. Han fekk frådelt eit stykke av farsgarden, 85/1 Volda, på Høydalsneset i 1918, og sette opp stovehus i Jaktevika i 1920. Han hadde tidleg fotoapparat, for glasplate, og mange av fotoa frå han er uvurderlig dokumentasjon frå ca 1918 og til han døde. Seinare brukte andre dette fotoapparatet som var og er i ypparleg stand.
Som tidlegare nemnt var båten bygd i 1928, men alt 12.10.1930 døde Hans. Årstala fortel at det vart ei kort periode han fekk glede av båten.
Brorsønene Sivert og Morits Høydalsnes overtok då båten. Dei melde båten til fiskeriregistrering den 11. januar 1933, med driftsområde heimefiskje og transport Dei spesifikasjonar som er gitt om båten er henta frå ” Fortegnelse over Merkepliktige Norske Fiskefarkoster”, i daglegtale kalla ”Fiskeriregisteret”. Båten er sletta i registeret 15. februar 1968.
”Heimefiskje” i Høydalen var truleg litt garnbruk og line i fjorden. På vårparten var det eit vist innsig av storsei, på dagar med godt ”drette” kunne det verte mange fiskar. Salta sei var vanleg kost utover sommaren.
”Transport” er vel knytta til behova i ei veglaus grend, der var det sjøvegen som var alternativet når ein skulle ut av bygda, antan det var til kommunesenteret i Volda, eller til andre bygder. Det var vanleg at innbyggarane i fjordbygdene hadde båt. Båten var før like naturleg som bilen er i dag.
Sønene til Morits, Hans og Alf Høydalsnes var dei siste lokale eigarane av «Dreng», dei overtok båten i 1978. Dei brukte båten til fritid og litt fiskje.
I 2005 – 2006 overtok Arvid Stokkenes båten. Han ville setje båten i stand slik han var som ny. Difor vart Sabbmotoren teken ut og Marnamotoren med utstyr vart leita fram og fylgde med. Denne delen av historia kan ein koma attende til seinare.
Motor
- Båten fekk innsett 4 hk Marnamotor, byggeår 1927. Motoren fekk i 1945 påsett m.a. bakstart og kobling, motoren var send til fabrikken for montering og overhaling.
- I 1988 skifta til 8-10 hk Sabb.
Kjelder
- Fortegnelse over Merkepliktige Norske Fiskefarkoster
- Merkeprotokoll Volda 11.01.33 https://media.digitalarkivet.no/view/111200/111
- Høidal, Eldar. 2007. Busetnadssoga for Volda bd 3
Bilder av MB «Dreng»
Fiskerinummer er ikkje måla på båten og då er bilde frå før 1933. Her ser det ut som båten skal på tur. Ved styrehuset står Sivert Høydalsnes, og framom står mora Jørgine Høydalsnes.
Her ligg MB «Dreng» M 64 VA ved Krokenkaia i Volda. Bak ligg MB «Laksen» og truleg MB «Turist» .
Marnamotoren vart send til fabrikken i Mandal for overhaling og montering av bakstart og kobling. Denne fakturaen viser prisane for eit slikt oppdrag i 1945.
Dette er kopi av den handskrivne kommunale protokollen for innmelding i fiskeriregisteret, også dato for sletting er med her.
