Flitavegen (Bø i Telemark)

Flitavegen i Bø i Midt-Telemark kommune går austover frå Bordvegen til krysset med Kåsinvegen og Torstveitvegen. Han er om lag 510 meter lang og går gjennom Flitafeltet. Dette er hovudtilkomstvegen til nordre del av Breisås bustadområde.

Flitavegen sett austover frå starten i Bordvegen.

Foto: Roy Olsen (2016).

Flitavegen sett sørvestover.

Foto: Roy Olsen (2016).

Parti frå øvre del av Flitavegen.

Foto: Roy Olsen (2017).

Vegen har namn etter den tidlegare garden Flita og blei namnsett i 1967.

Flitafeltet var det fyrste bustadfeltet som blei sett i gang i Breisås bustadområde i 1966. Pr. 2026 består busetnaden i Flitavegen av 17 einebustader, fleire med sokkelleilegheit. Dei fleste tomtene blei kjøpt av Bø kommune mellom 1964 og 1969, og hus blei sett opp kort tid etter.

Eigedomar

Nr.	Bilde	Om eigedomen
1	Foto: Roy Olsen (2026).	Gnr. 51/73, (tomt 63) Einebustad. Eivind Moen (1929–2005), g. m. Ragnhild Simonsbekk, kjøpte tomta av kommunen i 1965 og sette opp huset.
2	Foto: Roy Olsen (2025).	Gnr. 51/126, (tomt 67) Einebustad. Snikkar Gunnar Hegna (1911–1985), g. m. kokke Agnes Maline Brokka, kjøpte tomta av kommunen i 1967 og bygde huset. Her dreiv Agnes eit bakeri der ho baka kling, flatbrød og kringler.
3	Foto: Roy Olsen (2026).	Gnr. 51/95, (tomt 62) Einebustad med sokkelleilegheit. Sjåfør Paul Romnes (1945–2016), g. m. Marit Romnes, kjøpte tomta av kommunen i 1970. Huset sto ferdig i 1971.
4	Foto: Roy Olsen (2026).	Gnr. 51/129, (tomt 68) Einebustad. Navigatør Einar Nilsen (f. 1932) frå Eidanger, g. m. Åsne Agnes Heistad, kjøpte tomta av kommunen i 1968 og bygde huset.
5	Foto: Roy Olsen (2026).	Gnr. 51/110, (tomt 61) Einebustad. Sjåfør Alf Kristian Weiseth (1930–2011), g. m. Eldbjørg Weiseth, kjøpte tomta av kommunen.
6	Foto: Roy Olsen (2026).	Gnr. 51/113, (tomt 47) Einebustad med sokkelleilegheit. Pål Moen (f. 1923) frå Bykle, g. m. Sina Helene Bauge, kjøpte tomta av kommunen i 1968 og bygde.
7	Foto: Roy Olsen (2026).	Gnr. 51/84, (tomt 60) Einebustad med sokkelleilegheit. Kontorist Aksel Egenæs (1938–1999), g. m. Magnhild Ringhus, kjøpte tomta av kommunen i 1965. Huset sto ferdig i 1966.
8	Foto: Roy Olsen (2026).	Gnr. 51/108, (tomt 46) Einebustad. Tannlege Steinar Rue frå Brunkeberg kjøpte bustad og tomt av kommunen i 1974. Huset var bygd i 1971. Han selde i 1980 til Kolbjørn og Lucie Kristoffersen.
9	Foto: Roy Olsen (2026).	Gnr. 51/74, (tomt 59) Einebustad med sokkelleilegheit. Postfunksjonær Willy Martin Nymoen (1913–1989), g. m. kokke Anne Havskolt, kjøpte tomta av kommunen og bygde 1966–1967.
11	Foto: Roy Olsen (2026).	Gnr. 51/82, «Kveldsol» (tomt 58) Einebustad. Kjøpmann Hellek H. Sønstebø (1896–1985), g. m. Marie Haugland, kjøpte tomta av kommunen i 1968 og sette opp huset same året. Dei starta manufakturhander i Bøgata i 1928.
13	Foto: Roy Olsen (2026).	Gnr. 51/83, (tomt 57) Einebustad. Hege Myrene kjøpte tomta av kommunen i 1969. Huset blei sett opp same året.
15	Foto: Roy Olsen (2026).	Gnr. 51/89, (tomt 51) Einebustad med sokkelleilegheit. Torstein Myhre (1900–1971), g. m. Mari, f. Kleppe, kjøpte tomta av kommunen i 1964 og bygde huset 1967–1968.
17	Foto: Roy Olsen (2026).	Gnr. 51/79, (tomt 45) Einebustad med sokkelleilegheit. Jernbanefullmektig Tormod Fossnes (f. 1932), g. m. Marit Andrea Lindland, kjøpte tomta i 1964 og bygde same året. Fossnes var KrF-politikar og varaordførar i Bø i tre år fram til 1995, da han flytta til Grimstad. Han selde huset til Ella Marie Harkiolaki.
19	Foto: Roy Olsen (2026).	Gnr. 51/102, (tomt 19) Einebustad. Butikksjef Gunnar Hagen (f. 1939), g. m. Wenche Pedersen frå Oslo, kjøpte tomta av kommunen og bygde huset i 1966.
20	Foto: Roy Olsen (2026).	Gnr. 51/20, «Almankås» Einebustad. Tomt på ca. 4 da blei skild ut frå Oppheim (gnr. 51/4) i 1944 og kjøpt av montør Rudolf Gustavsen (1901–1958) på Østre Toten og Maren f. Almankås. Huset blei sett opp i 1947. Seinare blei to tomter skilde frå.
21	Foto: Roy Olsen (2026).	Gnr. 51/133, (tomt 18) Einebustad. Inspektør Ingvar Nicolay Pedersen (f. 1907) frå Oslo, g. m. Astrid Sofie Jensen, kjøpte tomta av kommunen i 1969 og bygde huset i 1972.
22	Foto: Roy Olsen (2026).	Gnr. 51/169, «Huus» Einebustad. Stasjonsmeister Ole Huus Kjæmperud (1915–2010), g. m. Lucie Larsen. Tomta er skild ut frå bnr. 20. Kjempærud kjøpte ho i 1973 og bygde i 1975

Sjå også

• Vegar i Midt-Telemark kommune

Kjelder og referansar

• Kommunekart: Flitavegen
• Kartverket, Eiendomsregisteret: Flitavegen
• Midt-Telemark kommune: Reguleringsplan for Flitafeltet (kart). Norsk Oppmåling og Flykartlegging, Kristian Bjørgul, Skien (1965 eller før)
• Henneseid, Stian. Bø-soga. Utg. Kommunen. 1982-1986?. 1982. Digital versjon på Nettbiblioteket. Flitavegen s. 484–490
• Diverse avisnotisar og annonsar i lokal- og fylkesavisene