Wilhelm Andreas Wexelsen (1828–1904)
Wilhelm Andreas Wexelsen (fødd 8. april 1828 i Ringsaker, død 1904 i Kristiania) var teolog, grundtvigianar og sokneprest i Eid og Oppdal. Han var farbror til den kjende statsråden og biskopen Vilhelm Andreas Wexelsen (1849-1909).
Foreldre
Foreldra var Wexel Hansen Wexelsen (1784-1867), som var forvaltar ved Hadelands Glasværk, og Marie Lovise f. Wexels (1793-1873). Ho var syster til den kjende grundtvigianske presten Wilhelm Andreas Wexels (1797–1866), som Wilhelm Andreas Wexelsen var mykje hjå i studietida. Hans søster var Marie Wexelsen (1832–1911)
Utdanning - kapellan
Wilhelm Andreas Wexelsen fekk fyrst undervisning hjå prost Hans Peter Schnitler Krag i Vågå 1839-1842 og var så på Fredrikshald latinskole til 1847 før han gjekk eit år hjå Heltbergs studentfabrikk. Han tok teologisk embetseksamen i 1855 og praktikum 1858.
Etter eksamen var Wexelsen ei tid lærar ved Kaptein Dessens Privatskole i Trondheim og to månader ved Klæbu seminar før han 13. oktober 1858 vart personleg kapellan hjå soknepresten på Hitra i Sør-Trøndelag. Den 22. oktober 1864 vart han residerande kapellan i Øvre Stjørdalen og 15. oktober 1870 sokneprest i Ofoten.
Sokneprest i Eid
Den 4. mai 1878 vart Wexelsen utnemnd til sokneprest i Eid i Sogn og Fjordane. Han var erklært grundtvigianar og venstremann, og han skipa her føredragslaget Eids folkesamlag i lag med to andre venstremenn, juristen Otto Blehr og læraren Lasse Trædal som var komne til Eid i 1872 og 1879. Trædal vart seinare gift med eldste dottera til Wexelsen.
Sokneprest i Oppdal
Wexelsen forlet Nordfjord etter at han 17. mai 1884 vart utnemnd til sokneprest i Oppdal i Sør-Trøndelag. Wexelsen fekk i 1888 Lasse Trædal til å kome til Oppdal og halde folkehøgskule ein vinter.
Wexelsen gjekk av med pensjon 21. mars 1890. Han budde deretter i Kristiania til han døydde i 1904.
Familie
Wexelsen gifte seg i Trondheim 13. juli 1860 med Johanne Henrikke Lyng (1837-1892), dotter av kjøpmann Joh. Daniel Fürstenberg Lyng i Trondheim og Ingeborg Martha Vanvig.
Dei fekk følgjande born:
- Ingeborg Louise Hermana Wexelsen (1861-1939), gift med Lasse Trædal
- Ragnhild Wexelsen (f. 1862), gift med fylkeslege Ludvig Trædal[1]
- Wexel Hansen Wexelsen (1864-1878)
- Sigrid Wexelsen (f. 1866), gift med sogneprest Alfred Eriksen (1864-1934), foreldre til bl.a. Erling Eriksen (1893-1967), generaldirektør for Oslo lysverker.
- Johanne Henrikke Wexelsen (1867), gift med telegrafassistent Anders Jørgen Aune
- Johan Daniel Fürstenberg Lyng Wexelsen (f. 1869), gift med Aagot Johnsen (Amerika)
- Andrea Sofie Wexelsen (f. 1871), ugift
- Wilhelm Andreas Wexelsen (1873–1936), tannlege
Referansar
Kjelder
- Vilhelm Andreas Vexelsen i folketelling 1865 for Øvre Stjørdal prestegjeld fra Digitalarkivet.
- Wilhelm Andreas Wexelsen i folketelling 1875 for Ofoten prestegjeld fra Digitalarkivet.
- Wilhelm Andreas Wexelsen i folketelling 1900 for Kristiania kjøpstad fra Digitalarkivet.
- Lampe, Johan Fredrik. (1896). Bergens stifts biskoper og præster efter reformationen. Biografiske efterretninger. (Bd. 2). Kristiania: Cammermeyer, s. 176-177. Digital versjon på Nettbiblioteket.
- Trædal, Svein. (1995). Trædals-slekta i tekst og bilde. Sandsli, s. 181ff. Digital versjon på Nettbiblioteket.
- Biografiske omtaler av Wilhelm Andreas Wexelsen (Nettstaden til oldebarnet Karl-Ludvig Grønhaug)
Eksterne lenker
| Artikkelen Wilhelm Andreas Wexelsen (1828–1904) er relevant for delprosjektet Prestefolk i Nordland |