Fyresdal folkebibliotek
Fyresdal folkebibliotek ligg i Fyresdal kommune i Telemark. Det vart oppretta som allmuebibliotek i 1854 og heldt dei fyrste åra til i prestegarden.
Tidleg soge
Før det vart ei ordning med offentleg bibliotek hadde enkelte som ville vite litt meir enn det «almueskolen» og læraren der kunne gjeve, fått nytte seg av presten si private boksamling. I dei tider var det nok den som kunne støtte litt opp om kunnskapshungeren jamvel om den naturleg nok kunne vere prega av teologisk litteratur.
På eit møte i heradstyret 19. april 1838 las ordføraren opp eit brev frå kyrkjedepartementet om boksamlingar, og gjorde framlegg om at det skulle verte laga til ei samling i heradet. Saka vart utsatt då ein ville samle inn pengar. I eit seinare møte synte det seg at bare 7 mann hadde teikna seg for 24 sk. kvar, og saka vart utsatt på nytt.
Prost Iver Andreas Teisner (1818-1870) var sokneprest i Fyresdal i tidsrommet 1848-1870. Han var særs dyktig på mange ulike felt, ikkje minst i det kommunale, og hans interesse i det administrative var vidt femnande. I 1854 fekk han oppretta eit «almuebibliotek» ved hjelp av eit offentleg bidrag på 25. spd. til å byrje med, i tillegg til frivillige tilskot frå enkelte menn i bygda. Sjølv gav han til biblioteket fleire av sine bøker. Frå fyrst av var biblioteket i prestegarden, presten stod då for utlånet og førde tilsyn med bøkene.
På slutten av 1800-talet var biblioteket på Folkvang i Folkestadbyen. Etter om lag 1925 var det på Fredtun i andre høgda der det framleis var på slutten av 1940 talet. På 1950 og 1960 talet heldt det til på Trudvang. Så kom det til ein fuktig kjellar i det nye kommunehuset før det fekk egna lokale i det nye samfunnshuset i 1983.
I 1945 var bibliotekinspektøren i Telemark, Torfinn Skard, der og såg over bøkene. Han sette Olav K. Skrede til å styre biblioteket og dette vart ordentleg, stort og godt. Biblioteket vart opna etter krigen i 1946, dette året var det 76 låntakarar. Ei tid etter krigen var Hjarand Bringa (1920-1966) styrar av Fyresdal folkebibliotek, han var og korrespondent for avisa Varden med initialane HEB.
Biblioteket hadde like etter krigen om lag 1300 bøker. Om lag 2/3 av bøkene var faglitteratur medan 1/3 var skjønnlitteratur. I 1943-1944 fekk biblioteket ei flott gåve, testamentert, etter sorenskrivar Orm Sitje, der var 850 bøker av mange slag.
Eit stort sprang i tid
«Fyresdal folkebibliotek ligg i same bygg som samfunnshuset. Like ved ligg både skulen, barnehagen og helsehuset. Biblioteket har populær boksamling, film, lydbøker, aviser, tidsskrift, 3 datamaskiner til fri bruk for publikum og trådlaust nettverk. Bøker biblioteket ikkje har, kan vi i regelen låne frå andre bibliotek. Det er mange sittegrupper på biblioteket og eit skjerma rom for lesing. Det er rikeleg med gratis parkeringsplassar og H-plassar. Biblioteket har trappefri tilkomst. Velkomen!» Biblioteksjef Fyresdal folkebibliotek: Liv Blørstad Kiland, 2019.
Biblioteksjefar
Liv Blørstad Kiland var biblioteksjef mellom 1994 og 2022, då ho gjekk av med pensjon. Då tok Christian Utigard frå Byrte i Tokke over. Etter ein aktiv periode slutta han i stillinga i 2023 for å take over tilsvarande stilling i Tokke kommune. Etter han kom Kari-Kristina Eidam.
Biletgalleri
Kommunehuset i Fyresdal 2017, delen til høgre er den eldste. Her var biblioteket ein periode før 1983. Bygget er fleire gonger blitt ombygd og påbygd.
Samfunnshuset i Fyresdal. Hit kom biblioteket i 1983, lokala har fleire gonger blitt utbetra og er i 2020 i fløyen til høgre.
Ex libris Fyresdal Folkeboksamling nytta i bok i 1967
Ex libris Fyresdal Folkebibliotek nytta i bok 1982
Fyresdal Folkebibliotek. Ex libris, gamal og nyare type
Lånereglar nytta av Fyresdal Folkeboksamling 1967
Lånereglar nytta av Fyresdal Folkebibliotek 1982
Ein låntakar ved Fyresdal Folkebibliotek truleg 1920åra. Foto Kjetil Skomdal
Bibliotekar Liv B. Kiland i kjent positur ved møtet som vart arrangert av Fyresdal Bygdekvinnelag i høve av at ho slutta i stillinga i Fyresdal. 31. mars 2022.
Christian Utigard slutta i 2023 som biblioteksjef og Kari - Kristina Eidam vart tilsatt i stillinga. Foto 29. september 2023.
Kjelder og til utdjupande lesnad
- Bringa, Hjarand: Fyresdal folkebibliotek – eit av dei eldste bygdebibliotek i landet. «Sjå deg attyvi». Fyresdal Sogelag 2000. Digital versjon på Nettbiblioteket.
- Qvisling, J. L.: Fyresdals historie. Rasmussen & Aarhus’ boktrykkeri. Skien 1912, ny utgåve 2001. ( s. 223). Digital versjon på Nettbiblioteket.
- Taraldlien, Bendik: Fyresdal : med bilæte. Fyrste utgåve 1910. Alb. Cammermeyers forlag. 1949. Digital versjon på Nettbiblioteket.