Olav Thon (1923–2024)

Olav Thon legg fram planane for handlestaden Strøget mellom Torggata 11 og Storgata 13 i Oslo.

Foto: Dagbladet/Norsk Folkemuseum (1969).

Olav Thon (fødd 29. juni 1923 i Ål i Hallingdal, død 16. november 2024) var ein forretningsmann som i lang tid har vore ein av landets rikaste personar. Han åtte Olav Thon Gruppen, ei gruppe selskap som mellom anna består av eigedom, hotell og kjøpesenter. I 2013 overførte Thon mesteparten av formuen sin til Olav Thon Stiftelsen. Han var òg ein ihuga friluftsmann og æresmedlem i Den Norske Turistforening.

Familie

Foreldra hans var Sevat Thon (1880–1973) og Margit Dokk (1888–1980). I 1950 gifta han seg med Inger-Johanne Gjærum (1919–2018), og dei busette seg på Sollihøgda i Hole. Olav Thon kjøpte også morsgarden Dokk i Ål. Som enkjemann gifta han seg opp att med Sissel Berdal Haga (f. 1940).

Olav Thon var bornlaus.

Liv og verksemd

Hotel Bristol i Oslo (opprinneleg frå 1920) vart kjøpt av Olav Thon i 1974, som det fyrste av hotella hans. Her eit bilete frå 2011.

Foto: Stig Rune Pedersen

Han voks opp på fjellgarden Søndre Ton ved Vatsfjorden i Ål, som den yngste av fire sysken. Av utdanning har Thon folkehøgskule og handelsskulekurs, og han lærte seg engelsk på eiga hand.

Alt som 16-åring drog han til Oslo for å selge skinn, og to år seinare opna han sin fyrste pelsbutikk: Volvat Pels på Majorstua.

I 1950 byrja han å investere i næringseigedom i Oslo-området. I 2020 åtte Olav Thon Gruppen om lag 500 næringseigedomar, og av desse var det 91 kjøpesenter. Utanfor Noreg hadde Thon eigedom fleire stader i Sverige (mellom anna i Charlottenberg), i Rotterdam og Brussel.

Hotelldrift var ein viktig del av forretningsverksemda til Thon. Det byrja med at han i 1974 kjøpte Hotel Bristol i Oslo. Hotellkjeden Rainbow Hotels (frå 2005: Thon Hotels) vart etablert i 1989. På 2000-talet kjøpte kjeden opp mange hotell i Noreg og fleire stader i Europa og vart eit av dei største hotellkonserna i landet.

Olav Thon døydde i 2024, 101 år gammal.

Kjelder og litteratur

Thon Hotel EU er eitt av Thon-kjeden sine hotell i Brussel.

Foto: Stig Rune Pedersen (2016)

• «Olav Thon» i Store norske leksikon
• Olav Thon er død, NRK. Publ. 2024-11-16.
• Warberg, Thor. Aal bygdesoge : slektssoga. 5 : Leveld og søre Vats : gnr. 59-86. Utg. Ål kommune. 2008. Digital versjon på Nettbiblioteket, s. 246-247.

Vidare lesing

• Berg, Hallgrim: Olav Thon : Milliardær i anorakk. Utg. Kagge forlag. 2009. Digital versjon på Nettbiblioteket.

På Lokalhistoriewiki skriver vi artikler om hundreåringer. Vi oppfordrer historielag og enkeltpersoner til å bli med på denne dugnaden. Vi ønsker både bilder og tekst om personene. Flere artikler og bilder finner du i denne alfabetiske oversikten.