Wiva Modeller AS
Wiva Modeller AS var ei konfeksjonsverksemd i Sykkylven. Bedrifta vart skipa som eit familieaksjelag og vart etablert på Fet i Velledalen i 1964. I utgangspunktet hadde selskapet desse eigarane: Borghild Neset, Oddrun Drabløs, Norvald Fet, Arne Fedt og Margit Fet. Aksjekapitalen var 10.000 kroner.
Drifta kom i gang på nyåret i 1965, og produksjonen var kjolar i crimplene-stoff. Crimplene stod svært sentralt i motebildet den tida. Som styrar vart Britt Pettersen frå Lofoten tilsett. Ho var nærskyld med kona til initiativtakaren, Arne Fedt, og ho hadde nett teke ei fire-årig utdanning i kjole- og draktsaum i Narvik. Som arbeidshjelp hadde ho sju kvinnelege syarar, og det kunne til tider vere trongt i produksjonslokala i gamle Drauvlaus skule.
Wiva Modeller heldt syarane med maskiner. Stoffet kjøpte dei dels frå Humlen Industrier A/S i Vegsund, og ein del vart importert frå Sveits. Bedrifta hadde eit godt utbygt salsapparat med agentar som dekte heile landet.
I 1973 flytta styraren, Britt Pettersen, til Trøndelag. Det var ingen som kunne fylle plassen hennar. Drifta av Wiva Modeller vart difor avvikla i Velledalen, og verksemda låg nede i mange år. I 1984 flytta Arne Fedt maskinene til Stranda, og kona, Marna, starta opp produksjon heime i bustaden deira. Etter at Arne vart pensjonert frå stillinga si som salssjef ved Alvo Fabrikker A/S, tok han del i drifta av Wiva Modeller. Det vart då eit ansvarleg selskap med Marna og Arne Fedt som innehavarar. Dei sydde blusar, skjorter og skjørt til institusjonsmarknaden. Dei heldt drifta i gang nokre år, før ho vart lagt ned.
Kjelde:
- Høidal, Eldar: Industrisoge for Sykkylven. Sykkylven 1990. Digital versjon på Nettbiblioteket.