Stabblandet

Satellittbilde av Stabblandet frå NASA World Wind.

Stabblandet er ei fjelløy som ligg mellom Tustna og Ertvågsøya på Nordmøre. Øya ligg i den tidlegare Tustna kommune, som frå 1. januar 2006 vart samanslegen med Aure kommune.

Fjella Litløra (t.v.) og Storøra sett frå myrane ovom Nord-Tustna skole.

Foto: Olve Utne

Topografi

Stabblandet ligg mellom øya Tustna over Solåsundet i vest og øya Ertvågsøya over Imarsundet i aust. Rett nordom Stabblandet ligg øya Solskjel, og i sør grensar Stabblandet til Vinjefjorden og til Halsa kommune på fastlandet.

Det er to fjellkjeder på Stabblandet, den kompakte Innerbergssalen/Stabben langsetter vestsida av øya og fjella Storøra og Litløra som fortset i ein mindre bergrygg langsetter austsida av øya. Mellom desse ligg dalen Soleimsdalen.

Fjell			Vatn og tjørner
Langs vestsida: Stabbfjellet Stabben (827 moh.) Nonsknubben på Stabblandet (796 moh.) Innerbergssalen (908 moh.)	Langs austsida: Runden (609 moh.) Slettbakktinden (765 moh.) Storøra (905 moh.) Ørbogfjellet (400 moh.) Bergskallen (345 moh.) Trollskardhaugen (197 moh.) Nauthatten (170 moh.)	Lengst søraust: Litløra (eldre namn: Imarn) (637 moh.)	Fuglsnesvatnet (ei lita tjørn i Fuglsnesdalen) Sagvikvatnet Ørbogvatna (tre småe tjørner i fjellet ovom Ørbogen) Fjelnesdalsvatnet

Busetting

Hovuddelen av befolkninga på Stabblandet bur på den relativt flatlendte nordenden av øya — på gardane Soleim og Nygarden, og særleg i grenda Nordheim lengst i nordaust. Grensande til Solåsundet på vestsida av øya finst grenda Innerberg, og grensande til Imarsundet på austsida av øya finst gardane Ørbogen, Fugelsnes og Aukan. På sørsida av øya ligg garden Fjelnesdalen.

Gardar

G.nr. 226 Fjelnesdalen (òg skrive «Fjellingsdal» G.nr. 227 Innerberg Yttervika G.nr. 228 Stabben G.nr. 229 Solem (òg skrive «Soleim»)

G.nr. 230 Nygarden G.nr. 233 Nordheim (òg kalla «Nautan») G.nr. 234 Haltvika G.nr. 235 Sagvika G.nr. 236 Ørbogen

G.nr. 237 Holå (no tillagt Hundhammaren) G.nr. 238 Fuglsnes (òg skrive «Fugelsnes») G.nr. 239 Blomtuå G.nr. 240 Karlsvika

Vegnett

Det er brusamband mellom øya Tustna og Stabblandet, og i januar 2007 vart det òg opna brusamband mellom Stabblandet og Ertvågsøya til erstatning for det tidlegare ferjesambandet frå Aukan ferjekai til Vinsternes på Ertvågsøya, Edøya i Smøla kommune og Forsnes på Hitra.

Det er òg veg søretter austsida av øya heilt til garden Aukan, og søretter vestsida av øya forbi Soleimsgardane søretter til Innerberg. Ein skogsveg går vidare frå Innerberg og ender opp i Fjelnesdalen.