Hallvard Ingolv Aarseth
Hallvard Ingolv Aarseth (fødd 4. oktober 1899 i Harøy i Sandøy kommune, død 1977) var lærar.
Han var son av Hallvard Aarseth (1870-1934) og Ingeborg f. Flovik. Familien budde i Øksendal, i noverande Sunndal kommune, der faren Hallvard var tilsett som lærar og kyrkjesongar. Hallvard I. Aarseth gjekk fyrst millomskulen i Volda, der han gjekk ut i 1917, og byrja så på Volda lærarskule. Aarseth tok eksamen i 1921.
Som nyutdanna var Aarseth lærar i heimbygda Øksendal 1921-24, dinest arbeidde han eit år ved Kjønnøy skule i Bremnes. Frå 1925 var han tilsett ved Eidsøra skule i Nesset kommune i Romsdal. Seinare var han ved Eidsvåg skule i same bygd.
I Nesset var han òg kommunerevisor, overformyndar og styreformann for gamleheimen. Hallvard I. Aarseth var dessutan lærarane sin representant i Nesset skulestyre.
Han var gift med Gudrun f. Angvik, dotter av bonde Martinus Angvik og Marit f. Brakstad. Paret fekk tre søner og fire døtrer.
Kilder og litteratur
- Hallvard Ingolv Aarseth i folketelling Øksendal herred fra Digitalarkivet
- Espeland, Arne: Norske skolefolk (første utgave), Dreyer forlag, Stavanger 1934. Digital versjon på Nettbiblioteket.
- Beite, Lars: Norske skolefolk (tredje utgave, bind 2), Stavanger 1966.