Hans Edvard Vadstrand (1859–1945)
Hans Edvard Henriksen Vadstrand (fødd 21. august 1859 i Borgund, død 6. januar 1945 i Oslo) var prest.
Han var son av Kathrine Eliasdtr (1828–1899) og arbeidar Henrik Johannes Vadstrand (1827–1920). Han vert fleire stader omtala som «arbeidersønn», medan faren i forskjellige kjelder har titlar som dagarbeidar, steinarbeidar og husmann.
Gjennom studietida livnæra han seg som telegrafistassistent, han vart student i 1884 og cand. theol. i 1890. Han jobba som lærar og skulebestyrer før han fekk si første prestestilling, som sokneprest i Beiarn prestegjeld i 1900. I 1905 vart han sokneprest i Folden prestegjeld, og i 1911 i Brønnøy prestegjeld. Fra 1911 var han også prost i Sør-Helgeland prosti. Han vart sokneprest i Ullensaker i 1919, og var frå 1921 også prost i Øvre Romerike prosti. Han gjekk av for aldersgrensa i 1930, og flytta etter dette til Oslo.
Ved sin 70 års dag vart han i Morgenposten omtala som «den kjente Nordlands- og Romeriksprelat», i ein nekrolog i Romerikes blad vert han skildra som ein «varmhjertet og dyktig prest som var avholdt i sine menigheter.»
18. juli 1891 vart han gift med Ragnhild Henriette Kokk. Ho var dotter av Karen og prost Bernhard Kokk. Dei fekk seks born, mellom dei dottera Solveig Katarina som var gift med presten Arne Arnborg. Sonen Henrik hadde byrja på medisinstudiet, men døydde av Spanskesyken berre 24 år gamal.
Ragnhild si eldste syster, Marie Eleonore, var gift med Lauritz Bang som hadde vore prest i Beiarn 1878–1887. Vadstrand var altså svoger med ein av sine forgjengarar i Beiarn, men ikkje med sin umiddelbare forgjengar Jørgen Blydt Mowinckel slik Erling Vegusdal skriv.
I folketellingane fra 1900, 1910 og 1920 bur faren hos Hans Edvard Vadstrand og vart forsørga av han.
Kjelder
- Norges geistlighet og andre norske teologiske kandidater i fast stilling i 1925. Utg. Hanche. Oslo. 1925. Digital versjon på Nettbiblioteket.
- Studentene fra 1912. Utg. Bokkomiteen for studentene fra 1912. Oslo. 1937. Digital versjon på Nettbiblioteket.
- Vegusdal, Erling. Beiarn soknekalls historie. Utg. [s.n.]. Beiarn. 1949. Digital versjon på Nettbiblioteket.
- Prost Hans Edvard Vadstrand 70 år. Morgenposten 1929.08.21. 19290821. Digital versjon på Nettbiblioteket.
- Dødsfall. Romerikes Blad 1945.01.09. 19450109. Digital versjon på Nettbiblioteket.
- Henrik Johannes Hansen Vadstrand i Historisk befolkningsregister
- Hans Edvard Henriksen Vadstrand i Historisk befolkningsregister
| Artikkelen Hans Edvard Vadstrand (1859–1945) er oppretta gjennom delprosjektet Prestefolk i Nordland
Brukarar på lokalhistorisk wiki kan fritt endre eller legge til innhald i artikkelen. Det vil ofte vere meir relevant informasjon i oppgitte kjelder enn det som først vart lagt til, og det kan t.d. finnast stoff i bygdebøker og liknande. |