Severin Aarskog

Utdrag frå nekrologen i Stavanger Aftenblad (10. juni 1949).

Severin Aarskog (fødd 26. juni (?) 1874 i Rovde på Sunnmøre, død 6. juni 1949), ofte berre S. Aarskog, var lærar og lokalpolitikar i Høle kommune ved Sandnes.

Han vaks opp i Årskog i Rovde, Sande kommune, som son av Johannes R. og Birte Aarskog. Severin Aarskog tok eksamen ved Kristiansand seminar i 1895. I 1896 fekk han stipend til lærarkurset i Tromsø. Også den yngre broren Johan vart lærar.

Som nyutdanna var han 1895-97 lærar i Målselv i Troms, i krinsane Målselven, Tagelvdal, Rognmo og Sollid. Dei neste to åra (1897-99) arbeidde Aarskog i Bjerkreim i Rogaland, der han var lærar ved skulane Bjerkreim, Lauperak og Ørsdal. Frå 1899 var han tilsett ved Horve skule i Høle, som no er ein del av Sandnes kommune.

I Høle hadde Aarskog fleire kommunale ombod. Han sat mellom anna som medlem av Høle heradsstyre 1912-21 og frå 1928. Severin Aarskog var formann i fattigstyret 1908-12 og frå 1932, og i bolken 1910-14 var han formann i likningsnemnda. Frå 1913 var han dessutan bankkasserar.

Han var gift med Anna Sørensdotter f. Røvde (1874-1937), dotter av Søren og Sunniva Røvde. Severin og Anna Aarskog fekk sonen Ragnvald (1900-46) og dottera Solveig (1902-?).

Severin Aarskog døydde andre pinsedag 1949, nær 75 år gammal. I eit minneord i Stavanger Aftenblad heitte det mellom anna at han var «kjend for den gilde frukthagen sin», og at han dreiv med jakt og sportsfiske. «Han var ein av dei som årvisst var på sunnmørslaget sine møte i Stavanger, og her og vil han verte sakna.»

Kjelder og litteratur

• DIS-Norge: Gravminner i Norge (id. 776558), med bilete av gravminnet på Høle kyrkjegard. På støtta er fødselsdatoen oppgjeven til 26. juli, men i andre kjelder står det 26. juni.
• Espeland, Arne: Norske skolefolk (første utgave), Dreyer forlag, Stavanger 1934. Digital versjon på Nettbiblioteket
• Severin Aarskog i Historisk befolkningsregister.
• Severin Johannessen Aarskog i folketeljinga 1900 for Høle herred frå Digitalarkivet
• Severin Johannessen Aarskog i folketeljinga 1910 for Høle herred frå Digitalarkivet
• Stavanger Aftenblad, 10. juni 1949: «Lærar Aarskog død».