Saltfiskball

Ball servert med potet, kålrabi, gulrøter, flatbrød og vatn. Her ser vi blandaball, men utsjånaden og tilhøret er i hovudsak den same som ved saltfiskball.

Foto: Olve Utne

Saltfiskball (utt. ["sɑʎ:hƫfɪskˌbɑʎ:] el. ["sɑʎ:hƫfeskˌbɑʎ:]) er ein fiske- og potetrett frå Romsdal, Ytre Nordmøre og Fosen. Hovudingrediensane i blandaballen er saltfisk (gjerne hyse eller lyr), potet og grynmjøl og/eller kveitemjøl. Saltfiskball er spesielt populær mat på Smøla på Nordmøre.

Variantar

I mange familiar er det vanleg å plassere feite av nitjefeitt (bitar av feitt frå mageområdet på sau) i sentrum av blandaballen. På grunn av at ikkje alle vil ha feite i ballen, er det vanleg at nokre ballar blir laga utan feite. Når det blir laga begge sortar, er det vanleg at ballane utan feite har avlang form. Denne typen ball blir kalla langball etter forma.

Ein variant utan kjøt er å erstatte nitjefeittet med småe terningar med smør. Ein del brukar òg fleskefeitt av gris i staden.

Sjå òg

• blandaball (som saltfiskball, men laga med ferskfisk)
• potetball (inneheld ikkje fisk)
• sildball (som saltfiskball, men med fersk eller salta sild heller enn kvit fisk som ingrediens)

---