Holmen (Fedje)

Flyfoto 1954. I framgrunnen frå venstre: Kremmarholmen bnr 62, bnr 60, bnr 6 (Holmen), bnr 1 (Prestestova), bnr 2 (den gamle handelsstaden). Bak Sulo, heilt bakarst frå venstre Langedalen og Hesthaugen.

Holmen var opphavleg tre ulike bruk. I panteregisteret frå 1770 til 1859 er det eitt blad for kvart av bruka Kremmarholmen, Holmen og Ertsholmen. Holmen er nemnd første gongen i 1563, Ertsholmnen i 1644 og Kremmarholmen i 1665. Dei to siste må vera frådelt frå Holmen. Ettersom alle tre bruka vart brukte meir og meir i lag, vart dei samanføydde til eitt bruk i 1859 og kalla Kremmarholmen av brørne Kristoffer og Arnold Kahrs. Dei eigde halvdelen kvar, og delte det nye bruket i to med kvart sitt bruksnummer.

Holmen med Kremmarholmen og Ertsholmen er ein holme som ligg midt i hovudhamna. Den ligg såleis sentralt til for båttrafikken, og det er derfor ikkje unaturleg at det var her det vart handels- og gjestgivarstad. Utanom denne holmen, omfatta òg denne eigedomen heile Vestkanten. Dette området var lenge utan busetnad, og vart brukt som beiteområde og utmark for Holmen. Utover på 1800-talet vart det fleire og fleire som fekk høve til å setja opp hus her, men utan tilgang til jord.